Ombudsman mosang-at og pormal nga imbistigasyon sa reklamo batok Abellanosa

Ang Office of the Ombudsman-Visayas mi-upgrade na ngadto sa usa ka “full-blown investigation” sa reklamo nga gipasaka sa usa ka lumulopyo sa Barangay Inayawan batok ni Konsehal Rodrigo “Bebot” Abellanosa.

Gimandoan ni Deputy Ombudsman Pelagio Apostol si Abellanosa nga mosumiter siya og counter-affidavit sa reklamo ni Philip Banguiran nga nagtoo nga nakahimo og kasaypanan ang konsehal.

Matud ni Banguiran nga nakahimo’g salaud si Abellanosa tungod sa pagtugot nga ang iyang pribadong tunghaan makabenipisyo sa scholarship program sa dakbayan sa Sugbo.

Basi sa rekord sa scholarship committee sa dakbayan sa Sugbo, ang Asian College of Technology (ACT) nga iya ni Abellanosa maoy labing daghan og scholars nga gihatagan og tag P10,000 gikan sa kagamhanan sa dakbayan. Nangangkon si Banguiran nga klaro kaayo nga usa ka “conflict of interest” ang gihimo ni Abellanosa tungod kay siya usa ka opisyal sa
dakbayan sa Sugbo.

Sa iyang bahin, si Abellanosa miingon nga nakasumiter na siya og tubag didto sa Ombudsman kabahin sa reklamo ni Banguiran, apan wala siya mohatag og kopya sa iyang counter-affidavit.

Matud ni Abellanosa nga giawhag niya ang Ombudsman nga i-dismiss ang reklamo ni Banguiran.

Ang hukom sa Ombudsman nga pag-upgrade sa pre-charge investigation ngadto sa formal investigation nagmatuod nga adunay basihanan ang reklamo ni Banguiran.

Sayo pa si Abellanosa nagtoo nga si Banguiran gisugo langni Atty. Aristotle Batuhan nga kontra niya sa pagka kongresista sa south district.

Gihagit ni Abellanosa si Batuhan nga maoy mohimo’g reklamo mao nga napugos si Batuhan pagpasaka’g susama nga kaso didto Office of the President sa Malacañang.