PNoy: Ipahibawo ang Gipalapdang Philhealth Coverage

Gi-aghat ni Presidente Benigno “Noynoy” Aquino III ang mga lokal nga kagamhanan aron magtinabangay sa pagpakatap sa impormasyon sa gipalapdang PhilHealth coverage.

Matud pa sa Presidente, nga daku ang papel ang mahimo sa LGUs tungod kay mas kahibalo sila sa panginahanglan sa mga konstituwente nila nga membro sa Philhealth.

Nagkanayon si Pres. Aquino nga dili mahimong malampuson ang usa ka programa kun dili mapahimuslan sa tanan nga benepisyaryo niini.

Ang maong pamahayag gihimo sa Pamuno’ng Nasud kagahapon Lunes sa iyang pagpanguna sa gilusad nga programa sa Philhealth nga mao ang “Alaga Ka Para sa Maayos na Buhay Program” didto sa Quezon Memorial Circle sa kaulohan.

Alang sa presidente, labing mauswagon ang nasud kun maatiman pag-ayo ang lawas sa katawhan pinaagi sa mga programa nga ipatuman sa kagamhanan.

Samtang gipakita usab sa Philhealth nga may katakus sila sa gipangayo nilang umento sa binuwan nga premium sa Philhealth.

Kini tungod kay gipalapdan nila ang pag-atiman sa kaayohan sa ilang mga membro.