Kagamhanan ug MILF Magpirmahay na sa CAB

Ang kagamhanan sa Pilipinas ug ang Moro Islamic Liberation Front (MILF) hingpit na nga nangandam sa usa ka makasaysayanon kaayong pagpinirmahay sa Comprehensive Agreement on the Bangsamoro (CAB) unya sa Marso 27 didto sa Malacañang Palace.

Ang chief negotiator sa kagamhanan nga si Miriam Coronel-Ferrer nagkanayon nga kining maong pagpinirmahay sa CAB nagtimaan sa tinarong nga panag-uban alang sa kalinaw ug kahusay tali sa kagamhanan ug sa Moro Islamic Liberation Front.

“This partnership is based on our shared aspiration to heal the wounds of conflict, enable meaningful autonomy for the Bangsamoro, and nurture peace and development in Muslim Mindanao,” sumala ni Ferrer.

Ang CAB maoy nag-atiman sa tanang dagkong kasabotan nga gipirmahan sa duha ka partido sulod na sa 17 ka tuig nga gidugayon.

Ang labing mahinungdanong bahin niini mao ang Framework Agreement on the Bangsamoro (FAB) ug sa upat nga gipataban niini nga mga kondisyon.

Kining dokumento nga pirmahanan sa kagamhanan ug sa MILF magsilbi nga subayanan ug giya sa katukoran sa katibuk-ang Bangsamoro ug kausaban sa MILF gikan sa pagka-armado niini ngadto sa pagka-aktibong sumasalmot sa mga programa alang sa kaayohan sa kagamhanan.

“From the FAB to the CAB, we have come a long way,” sumala pa ni Coronel-Ferrer.

“We dedicate the signing of the CAB to all the people who have helped us reach this stage in the journey”, dugang pa niya.

Midugang siya nga usa kini ka dakong utang kabubut-on kanila kay kini maoy usa ka kahigayonan sa panagsuod sa katawhan alang sa usa ka tinguha sa kauswagan ubos sa usa ka nasud nga mobarug labaw sa tibuok komunidad sa kalibotan.