DOH-7: Usa pay Namatay sa AIDS

Gibutyag sa Department of Health (DOH-7) nga may usa ka tawo ang namatay sa full blown Acquired Immunodeficiency Syndrome (AIDS) dinhi sa Sugbo.

Si Renan Cimafranca, pangulo sa Regional Epidemiology and Surveillance Unit (RESU) sa DOH-7 mitug-an nga ang maong pasyente namatay sa Vicente Sotto Memorial Medical Center niadtong bulan sa Enero ning tuiga.

Apan daling giklaro ni Cimafranca nga ang namatay sa AIDS dili taga Sugbo kundili gikan sa laing probinsiya gawas sa Central Visayas ug dinhi lamang sa Sugbo nagpatambal.

Si Cimafranca nagdumili sa pagtug-an sa ngalan ug address sa naasoy nga biktima sanglit gikonsiderar man kini nga sensitibong kaso sa naasoy nga sakit.

Gipahibawo hinuon ni Cimafranca nga sugod ning tuiga ang ilang buhatan may matala matag bulan nga dili mominus usa ka pasyente nga reactive o positibo sa mga tilimad-on sa sakit nga AIDS o kaha Human Immunodeficiency Virus (HIV) sukad niadtong bulan sa Enero.

Tungod niini, ang RESU-7 mitumbok nga nagsaka ang gidaghanon sa natakbuyan sa sakit nga HIV/AIDS, sumala pa ni Cimafranca.

Hinungdan

Gitug-a ni Cimafranca nga ang kasagaran sa hinungdan sa pagtakboy sa sakit nga HIV/AIDS mao ang naggamit og “novaine” usa ka matang sa illegal nga drugas diin ang drug addict mogamit og syringe o dagum sa injection ug ipasa-pasa kini sa kaubanan.

Ikaduha ang “unprotected sex” ilabina ngadto sa mga mugbo’g lupad nga kabayen-an o kaha ang pag-unay og pakighilawas sa susamang sex.

Nagkanayon usab si Cimafranca nga niining labing ulahi nilang record sa RESU-7, walay nalambigit nga seaman o nagtrabaho sa gawas sa nasud.

Subay usab niini gihingusgan karon ang kampanya sa DOH-7 sa paggamit og condom pagsiguro nga luwas sa HIV/AIDS kun makighilawas sa masakiton nga paris.

Sa samang higayon gidili usab sa DOH ang paggamit pag-usab sa dagum nga nagamit na aron makalikay sa naasoy nga sakit.