‘Makabenepisyo sa Pilipinas ang Presensya sa US’- Lacierda

Daghang benepisyo ang makuha sa Pilipinas kun mahinayon ang kasabotan kalabot sa dugang presensya sa mga sundalong Amerikano dinhi sa nasud.

Matud pa ni Presidential spokesman Edwin Lacierda, ang kasabotang nauyonan tali sa Estados Unidos sama sa Visiting Forces Agreement ug Mutual Defense Treaty, siguradong makatabang sa Pilipinas sa natad sa technology transfer ug disaster response.

Giingong ang rason nganong makatabang kini mao ang pagbaton og technology transfer, apil na usab ang pagbayloay og kahibalo sa mga sundalong Amerikano ug Filipino sa himoon nilang dungan pagbansay-bansay.

“Pabubutihin nito ang kakayahang magtanggol ng Pilipinas sa pagiging handang lagi. Itulot ninyong bigyang diin ko na ang isang bahagi ng rotational presence na ito sa kasalukuyan ay ang pagtutuon ng pansin sa pagiging handa sa panahon ng kalamidad at kung paano mababawasan ang kalamidad,” matud pa ni Lacierda.

Nakita sa gobyerno sa Pilipinas ang dakung kabag-ohang mahitabo kalabot sa ‘increased rotational presence’, ilabi na sa dihang mipadala ang tropang Amerikano sa mga kasangkapan niini sa Central Visayas atol sa pagpanghasi sa labing kusog nga bagyong Yolanda.

Sa maong higayon mipadala ang Estados Unidos og mga bapor, eroplano, helikopter ug military vehicles, aron tabangan ang gobyerno sa paghatud sa mga relief goods, supplies ug equipment sa mga naapektohang dapit sa Visayas region.

Samtang giingong dili na kinahanglan pang ratipikahan sa Senado ang bag-ong kasabotan bahin sa dugang rotational presence sa mga sundawo sa Estados Unidos dinhi sa nasud.