Balaod sa Single Maritime Administration, Gipirmahan ni PNoy

Gilagdaan na ni Presidente Benigno ‘Noynoy’ Aquino III ang Republic Act 10635 o Single Maritime Administration aron hiusahon ang nagkalin-laing ahensya sa gobyerno nga may kalabotan sa mga Filipino seaman sa nasud.

Matud ni Presidential Communication Operation Office (PCOO) Secretary Herminio ‘Sonny’ Coloma Jr., 30 ka ahensya ang agi-an una sa mga seaman sa dili pa sila ma-deploy nga giingong dili kumporme sa gipatuman nga seafarers’ regulations sa tibuok kalibotan mao nga gi-mugna ang maong balaod.

Ang maong balaodnon nga gipalabang ni Angkla partylist Rep. Jesulito Manalo, nagtudlo sa Maritime Industry Authority (MARINA) isip nag-inusarang ahensya sa gobyerno nga mopahigayon og pagbansay ug accreditation sa tanang seaman sa tibuok nasud.

Gilagdaan sa Presidente niadtong Marso 13, ang RA 10635 naghatag sa MARINA og otoridad sa pagdawat sa tanang gahom ug buhat sa Professional Regulation Commission (PRC), Commission on Higher Education (CHED), Technical Education and Skills Development Authority (TESDA), Department of Health (DOH) ug National Telecommunications Commission (NTC) kalabot sa issuance, validation, verification, correction, revocation o cancellation of certificates of competency, endorsement, proficiency and documentary evidence nga gipangayo sa tanang seafarers ug ubang butang kalabot sa implementasyon sa oversight sa implementasyon sa 1978 International Convention on Standards of Training, Certification and Watchkeeping for Seafarers.

Kini usab adunay mga probisyon nga nagtinguha malikayan ang pagkatangtang sa trabaho sa mga seaman nga anaa sa mga barko nga nagdala sa bandila sa European Union.

Una niini, nihatag og pahayag ang European Maritime Safety Agency (EMSA) nga ang Pilipinas wala nakasunod sa pipila ka probisyon sa usa ka pangkalibotanong kumbensyon sa mga seaman. (With press release PIA7-Bohol/ECB)

Image Credit: en.wikipedia.org