Bag-ong Desinyo sa Plaka sa Sakyanan Mogawas sa Abril

Gipahibalo ni Secretary Jun Abaya sa Department of Transportation and Communications (DOTC) nga ipagawas na ang mga plaka nga adunay bag-ong disenyo sa tunga-tunga sa Abril karong tuiga.

Gipasabot sa kalihim nga niadtong Pebrero pa giduso ni Land Transportation Office (LTO) Chief Alfonso Tan ang unang hut-ong sa mga plaka nga gi-order.

Giingong adunay 45 ka adlaw nga committed delivery period, gawas pa sa panahon nga mapakanaog ang maong mga plaka ngadto sa mga distrito gikan sa central office.

Midugang si Abaya nga ang nahimong problema sa maong mga plaka tungod kay kaniadtong 2011, gi-ilisan ang supplier niini kay wala makahatag sa tukmang gidaghanon sa order.

Tungod niini, mi-desisyon ang DOTC ug LTO nga magbaton og bidding diin managlahing contractor ang midaog alang sa metal plate, sticker ug emboss.

Matud pa, nalangan ang maong proyekto tungod kay nagtinudloay pa og usa ka kontraktor nga gitahasan sa maong trabaho.

Giingong nagkantidad og P3.8 bilyon ang anaa sa napulo ka milyon nga plaka nga i-deliver sulod sa lima ka tuig.

Dugang pa ni Abaya, nga sama sa daang plaka, nagkantidad og P450 ang matag usa niini nga adunay bag-ong disenyo samtang P120 ang kantidad sa bag-ong plaka sa motorsiklo.

Image Credit: www.rappler.com