Pagtabon sa Dagway, Gidili sa Dakbayan sa Bogo

Kadtong mga tawo nga magsul-ob og mascara unya moadto sa dakbayan sa Bogo sigurado nga makamulta og P5,000 kay gidili na ang pagsul-ob og maskara didto sa mao nga dakbayan.

Tanan ang gidid-an apil ang mga magmaneho og motorsiklo maoy sagad magmaskara aron dili molagom ang ilang panagway.

Ang ordinansa nga gisugyot ni Konsehal Rhett Minguez nagdili ni bisan kinsa nga mag maskara ug magsul-ob og uban pang tabon sa nawong. Ang ordinansa gipirmahan na ni Mayor Celestino Martinez Jr.

Tumong sa ordinansa nga masanta ang bisan kinsa nga nagtinguha nga mohimo og krimen pinaagi sa pagtago sa ilang panagway. Ang ordinansa gisugyot ni Konsehal Rhett Minguez.

Multa nga P1,000 ug usa ka adlaw nga pagkapriso ang ipahamtang sa makahimo’g kalapasan sa unang higayon; P2,000 ug duha ka adlaw nga pagkapriso sa ikaduhang kalapasan ug P5,000 ug usa ka buwan nga pagkabilanggo sa ikatulong kalapasan.

Ang kapolisan sa dakbayan sa Bogo unang nirekomendar sa pagpasar sa maong ordinansa aron maalkontrahan nila ang paghimo og bisan unsa nga binuang sa ilang dapit.

Nakita sa konseho nga makatarunganon ang tumong sa kapolisan aron pagsanta sa mga dautang elemento nga mohimo og krimen.

Gawas sa kapolisan, gihatagan og katungod nga makadakop sa magmaskara ang mga opisyal sa kabarangayan, traffic enforcers, ug mga tanod.