DOH-7: TB sa Prisohan Angay Masumpo

Gikinahanglan sa kagamhanan nga kapugngan ang pagsaka sa sakit nga tuberculosis (TB) sulod sa mga bilanggoan sa nasud.

Mao kini ang gibutyag ni Regional Director Jaime Bernadas sa Department of Health (DOH)-7 kinsa mibutyag nga dili mawagtang ang sakit sa baga sa mga piniriso gawas kun may hustong lakang nga himoon ang kagamhanan.

Gani alang kang Bernadas, may dakong tulubagon ang mga kapolisan ug mga opisyal sa lokal nga kagamhanan kinsa magpabaya sa pagsil-ing sa panglawas sa mga piniriso.

Miingon si Bernadas nga gikinahanglan unta nga sa dili pa isulod sa prisohan ang tawo, angay’ng susihon ang panglawas niini kun di ba masakiton og TB. Kini tungod kay kun masakiton kini, dali ra kining modaghan didto sa sulod tungod kay sirado kaayo ang ilang selda.

Nagkanayon si Bernadas nga aron kini kalikayan, angay nga maayo daan og lawas ang tawo una siya ipaslak sa prisohan aron nga dili siya daling mamatay samtang magsilbi sa iyang sentensya sa bilanggoan.

Midugang si Bernadas nga gawas kun may bag-ong pamaagi ang kagamhanan sa pagsuta sa panglawas sa tawong prisohonon, magpadayon ang sakit nga TB sulod sa mga prisohan sa nasud.