BIN sa SRP Nagpatabang sa Konseho

Luoy kaayo ang 48 ka sakop sa Barangay Intelligence Network (BIN) nga gipabantay sa South Road Properties (SRP) kay lima na ka buwan nga wala sila makadawat sa ilang honoraryom nga nagkantidad tanan og P802,500 ug wala na sila’y malung-ag nga pagkaon.

Mihangyo ang mga BIN ngadto sa mga konsehal nga tabangan unta sila nga makobra na ang ilang honoraryom. Ang mga BIN girepresentahan sa ilang hepe nga si Nicanor Vergara.

“Kami naghangyo kaninyo sa kinasing-kasing nga inyo kaming gahinan, inyo kaming kaloy-an nga unta hatagan kami sa katin-awan nga makuha namo ang among honorarium gikan sa Enero hangtud Mayo 2013, diin kini lamang ang among gisaligan para sa among pamilya ug kami usab makabayad sa among giutangan,” matud ni Vergara sa iyang suwat.

Ang mga sakop sa BIN nga nagbantay sa SRP nagdawat og binuwan nga honoraryom gikan sa City Hall ug ang kantidad depende sa ilang posisyon. Ang supervisor (P5,000) Guard III (P4,000), Guard II (P3,500) ug Guard I (P3,000).

“Ang among honorarium mao lang tawon ang gisaligan sa among tagsa-tagsa ka pamilya apan hangtud karon wa gihapon mi kadawat. Hangtud karon wa gihapon mi makatilaw sa among honorarium,” matud ni Vergara.

Si Vergara nagtoo nga wala gihatag sa City Hall ang ilang honoraryom kay nidawat sila og bugas nga gihatag ni kanhi kongresista Tomas Osmeña.

Matud ni Vergara nga gitang-tang ang pangalan sa 48 ka gwardya sa payroll ug gihulipan og laing ngalan gikan sa mga myembro sa Barangay Peacekeeping Action Team (BPAT).

Ang pagpatrabaho sa mga BIN isip gwardya sa SRP nagsugod atol nga si Osmeña mao pa ang mayor sa dakbayan.

Matud ni Vergara nga dili makatarungan ang gibuhat sa mga opisyal sa City Hall kay gihagoan nila ang honoraryom nga ilang gipaabot.

Ang konseho sa dakbayan mi-awhag sa 48 ka sakop sa BIN nga motambong sila sa ipahigayon nga executive session karong Abril 23 aron paghatag og katin-awan sa isyu.

Image Credit: www.philstar.com