BFP: Brgy. Fire Brigade Daku’g Tabang Pagsumpo sa Sunog

Samtang giangkon sa kadagkuan sa Bureau of Fire and Protection (BFP) nga ang ilang mga sakyanan dili makasugakod sa pagpawong sa sunog sa bukid ilabina kun sagkaon kaayo, mitataw usab kini nga daku og tabang ang mga barangay fire brigade.

Sumala ni Cebu City Fire Department Chief Rogelio Bungabong nga dili tanang mga sunog dali nilang ma-respondehan ilabina na karon nga tulo sa ilang dagkong mga fire trucks ang naguba.

Gihulagway hinuon ni Bungabong nga ang nangagubang fire trucks mga “vintage fire trucks”, tungod sa kakaraan na niini, hinungdan nga dali ra usab kining maguba kun mapaayo man kini.

Gitataw usab niya nga ang labing lisud nilang masulbad mao ang mga sunog sa bukirang lugar tungod sa kalisod sa pagsaka sa mga fire trucks.

Hinuon dako ug ikatabang ang mga fire sub-station nga may bag-ong mga fire trucks, matud ni Bungabong.

Apan iyang gitataw nga mas makatabang usab sa ilang kampanya sa pagsumpo sa sunog ang barangay nga may fire brigade ug nakapalit usab og mga fire trucks, kay dali ra man kining makaresponde kun may sunog mismo sa ilang barangay.