Tanang Pasyente sa Tipos sa Tuburan, Luwas na

Gipahibawo sa Department of Health (DOH-7) nga nakagawas na gikan sa tambalanan ang tanang mga nabiktima sa tipos didto sa barangay Montealegre lungsod sa Tuburan.

Sumala ni Renan Cimafranca sa Regional Epidemiology and Surveillance Unit (RESU-7) nga ang katapusang tulo ka mga bata nga gitipos nakagawas sa tambalanan niadtong Myerkules.

Si Cimafranca nagkanayon nga bisan og nangaayo na ang tanang 39 ka biktima sa tipos didto sa Tuburan, ang iyang mga sakop padayon nga nagmonitor sa tanang mga sitio sa naasoy nga barangay ug pagsusi sa tinubdan sa tubig nga maoy gigikanan sa kontaminasyon sa hugaw sa tawo o hayop.

Nagkanayon si Cimafranca nga gipadayon usab nila pagtudlo ang mga residente pag-chlorinate sa tubig sa dili pa kini imnon ug sa pagpanglimpyo sa palibot, paglikay sa kagaw nga makadaut sa panglawas sa tawo.

Kini samtang padayon pang nagpaabot ang ilang buhatan sa resulta sa laboratory test sa water sample nga ilang gikuha sa atabay ug ubang tinubdan sa tubig sa naasoy nga barangay.