DA-7: Industriya sa Hayop, Apektado sa El Niño

Gitataw sa mga opisyal sa Department of Agriculture (DA-7) nga dako og epekto sa industriya sa kahayopan ang nag taliabot nga El Niño phenomenon sa nasud.

Matud pa ni Regional Technical Director Joel Elumba sa DA 7 nga sa panahon sa ting-init, mokibra ang gana sa hayop sa pakig hilawas tungod sa kaigang sa ilang lawas.

Miingon si Elumba nga dili kaayo ganahan ang mga hayop makighilawas sa ilang isig ka-ingon kun init ang ilang palibot.

Sa laktud, menus ang pagsanay nila sa maong panahon itandi sa panahon nga normal.

Midugang si Elumba nga sa panahon sa ting-init, mosaka usab ang presyo sa karne tungod kay magnihit ang supply niini.

Hinay usab ang tinuboan sa lawas sa hayop kun init ang panahon ilabi na kun menus og pagkaon nga giandam ang tag-iya kanila, sumala pa ni Elumba.

Gani iyang giawhag ang mga mag-uuma nga angay daginoton ang mga sagbot o dagami sa mais ug humay pinaagi sa maayong paghipus niini.

Imbis nga dauban, angay kining ipreserbar sa usa ka kamalig nga sirado ug dili masalibohan sa uwan kay sa panahon sa ting-init, mahimo kining galabon, sagolan og tahop ug tubig, ug ipakaon sa mananap.

Miingon si Elumba nga mao kini ang solusyon sa mga lugar diin mangamatay ang mga tanom nga kan-onon sa mga hayop sa panahon sa ting-init.

Ang maong pamahayag gihimo ni Elumba human ibutyag sa PAGASA nga adunay huwaw nga moabot sa nasud nga magsugod sa hinapos sa buwan sa Marso.