“City Roads” Ipa-Classify

Dunay daghang karsada dinhi sa dakbayan sa Sugbo nga giisip nga “city roads” ang isugyot nga ipa-classify na kini nga national roads, aron ang Department of Public Works and Highways (DPWH) na ang maoy moatiman.

Gipahibalo kini ni Engr. Kenneth Carmelita Enriquez, ang hepe sa Department of Planning and Development Office (CPDO), nga gikahinabi sa MetroCebu News (MCN).

Wala hinoon ikabutyag ni Enriquez kun unsa kini nga mga karsada, apan matud niya daghan kining mao nga “city roads” nga giplanohan nila nga itugyan sa DPWH.

Bisan si Mayor Michael Rama daan na nga nagtinguha nga ang ubay-ubay nga karsada dinhi sa dakbayan itugyan sa DPWH aron ang nasudnong kagamhanan na ang moatiman.

Base sa lagda, ang DPWH momentinar lang sa mga karsada nga gi-classify nga national roads, samtang ang mga city ug municipal roads obligasyon sa dakbayan o lungsod ang pag-atiman sa maong mga karsada.

Gikatahong nabantayan nga daghan og kwarta ang DPWH kay bisan ang mga maayo pa nga karsada sama sa M.C. Briones Street atubangan sa Cebu City Hall, giguba nila aron lang usbon sa pag-aspalto.

Si Enriquez mismo miingon nga dili gayud unta kadto “priority” nga ayuhon ang mao nga karsada nga hilabihan pa ka sinaw sa aspalto.

Nabantayan usab ni Mayor Rama nga dunay mga gutter sa aseras sama sa Natalio Bacalso Avenue nga gipang-ayo sa DPWH pinaagi sa ilang gikuha nga kontraktor.

Ang karsada didto sa Barangay Busay unahan sa Marco Polo Plaza Hotel, giguba ‘sab sa DPWH bisan og maayo pa kaayo ang mao nga karsada aron lang g’yud usbon sa pag-aspalto.

Image Credit: www.dpwh.gov.ph