DepEd, DOLE Motanyag og ‘Summer Job’ sa mga Estudyante

Motanyag og trabaho ang Department of Education (DepEd) pinaagi sa Office of the Undersecretary for Regional Operations, sa pipila ka estudyante nga gustong mokita karong summer vacation.

Gipahibalo sa DepEd nga nanawat na sila karon og aplikasyon alang sa Special Program for the Employment of Students (SPES).

SPES

Ang SPES usa ka tinuig nga summer employment program sa DepEd nga nag-aghat sa mga estudyante nga himuong produktibo ang ilang bakasyon gawas pa sa oportunidad nga mokita og dugang salapi nga ilang magamit sa umaabot nga pagbukas sa klase.

Gipangunahan sa Department of Labor and Employment (DOLE) kining maong programa nga gisuportaan usab sa uban pang mga ahensya sa gobyerno.

Kalipikasyon

Ang kalipikasyon alang sa mga interesadong mosulod niining summer jobs kinahanglang estudyante o out-of-school youth nga may edad 18 anyos hangtud 25 anyos.

Kinahanglan usab nga naka-enroll sa usa ka tunghaan o kun dili gani, angay nga adunay intensyong mo-enrol sa sunod nga school year.

Dili angay molapas sa P143,000 ang gihiusang tinuig nga kita (annual income) sa mga ginikanan sa estudyante.

Kinahanglan usab nga adunay office-related ug computer-related skills ang interesadong aplikante.

Mahimong ma-download ang application form pinaagi niining link.

30 ka Adlaw nga Trabaho

Kun madawat ang aplikante, 30 ka adlaw kining mo-trabaho ubos sa supervision sa SPES 2014 Secretariat sa DepED – Central Office.

Dinhi sa lalawigan sa Sugbo, bisitahon lamang ang buhatan sa Department of Labor and Employment Office (DOLE) sa mga sanga nga dalan sa Gorordo Avenue ug Gen. Maxilom Ave, alang sa dugang detalye.