Mga Pasado sa LET Pa-Aplyayon sa DepED

Giawhag ni Regional Director Dr. Carmelita Dulangon sa Department of Education (DepEd) 7 ang mga nakapasar sa Licensure Examination for Teachers (LET) niadtong bulan sa Enero, ilabina na sa mga top notchers nga taga Sugbo, nga mo-apply sa ilang buhatan.

Kini aron makatabang sa pagtudlo sa nagkadaghan nga mga tinun-an dinhi sa lalawigan ug sa Central Visayas.

Matud pa ni Dulangon nga dako kaayo og panginahanglan sa mga bag-ong mga magtutudlo karon dinhi sa Central Visayas.

Apan wala una itug-an niini ang tukmang gidaghanon sa mga magtutudlo sa rehiyon ug kun pila usab ang ilang gikinahanglan.

Gibuhian niini ang maong awhag alang sa mga nakapasar sa naasoy nga board examination human motumaw ang report nga daghang mga magtutudlo nga buot nga motudlo didto sa gawas sa nasud tungod sa kadako sa makuha niining suhol.

Nasayran nga sila Pauly Mariz Tampon Recio sa Cebu Normal University (CNU) ug Rica Alessandra delos Reyes Young sa Cebu Technological University (CTU) pulos anaa sa 5th place sa top ten sa elementary level nga pulos nakakuha og 87 per cent nga rating.

Samtang sa 8th place usab sila si Mary Kenth Ababao Aceret ug Jasson Simborio Singculan pulos sa University of Cebu (UC) nga nakakuha og 86.40 percent rating.

Si Kristine Myrene Rose Lado Sayre sa University of the Visayas (UV) anaa usab sa 9th place nga may 86.20 percent rating.

Samtang sa secondary level, si Carla Mae Limpag Sumalinog sa University of San Carlos (USC) anaa sa 10th place nga may 86.20 percent rating.

Ang Professional Regulation Commission (PRC) mipahibawo nga sa 38,377 ka mga examinees sa elementary level, 11,120 o 28.98 percent niini ang nakapasar.

Samtang sa secondary level, 12,033 o 28.41 percent usab sa 42,358 examinees ang napakapasar.