DOH-7: Kaso sa Tipos sa Tuburan Mikabat na’g 91

Gawas nga gi-imbestigar pa sa Regional Epidemiology and Surveillance Unit (RESU-7) ang kaso sa typhoid fever o tipos nga mitumaw didto sa lungsod sa Tuburan, ang Department of Health (DOH-7) mipahibawo nga mikabat na sa 91 ka kaso sa maong sakit apan walay patay ang natala sa Central Visayas gikan sa bulan sa Enero hangtud sa Pebrero 22 ning tuiga.

Base sa record nga nahipus sa buhatan ni Renan Cimafranca sa RESU-7, ang maong gidaghanon mas ubos hinuon og 75.5 porsyento itandi sa miaging tuig sa susama gihapong petsa nga may 371 ka kaso ug 6 ang patay.

Si Labryna Cafiel, usa sa mga assistant ni Cimafranca, nagkanayon nga ang nag-unang dapit nga labing daghan og kaso sa tipus dinhi sa Central Visayas mao ang Guihulngan, Negros Oriental nga may 24 ka kaso; gisundan sa Jagna , Bohol nga may 7 ka kaso; Vallehermoso sa Bohol may 5 ka kaso; Cebu City, Duero sa Bohol ug Mabinay sa Negros Oriental nga pulos may tag-4 ka mga kaso.

Ang matag usa Anda sa Bohol, Jimalalud sa Negros Orieantal ug Siaton sa Negros Oriental nga pulos may tag- tulo ka kaso ug ang Bindoy sa Negros Oriental nga may duha ka kaso.

Ang DOH-7 officials nitambag sa katawhan nga magpakonsulta dayon sa doktor kun makasinati og nanghinubrang hilanat, grabing pagsakit sa ulo, pagkaluya sa lawas, dili ganahan mokaon ug diarrhea o constipation aron matambalan dayon kini sa mga mananambal kay mao kini ang mga semtoma sa typhoid fever.

Samtang si Tuburan mayor Aljon Diamente nipahibawo nga mikabat na sa 20 ka mga residente sa barangay Montealegre, Tuburan ang natakbuyan sa tipos ug nalandig usab sa tambalanan.

Iya hinuong gipahibawo nga giatiman na usab kini na sa municipal health office sa ilang lungsod uban ang abag sa mga kawani sa Integrated Provincial Health Office (IPHO) ug sa DOH-7.

Iyang gitumbok nga mipadala na siya og supply nga mainom nga tubig ngadto sa apektadong mga residente sa naasoy nga barangay aron dili na kini mogamit sa tubig sa atabay nga maoy giingong tinubdan sa maong kagaw nga nagdala sa sakit nga tipos.

Dugang pa sa mayor nga ang iyang buhatan nagpadayon sa paghatag og ayuda sa mga nabiktima sa tipos sa iyang lungsod.