Supply sa Karneng Baboy Nagnihit

Nagnihit ang supply sa karneng baboy sa kamerkadohan dinhi sa Sugbo ug sa Central Visayas tungod kay nihit usab ang supply niini.

Sumala ni Rolando Tambago, Presidente sa Central Visayas Pork Producers’ Cooperative(CVPPC) nga gawas nga nihit ang baboy, mitaas usab ang demand ning maong palaliton didto sa Region 8 o Eastern Visayas.

Si Tambago miingon nga ang ilang counterpart sa Mindanao dili na maka-supply og karneng baboy sa Cebu kay adto ra kini mahurot sa syudad sa Tacloban, ug sa ubang mga lugar sa Leyte ug Samar nga grabing naapektohan sa bagyong Yolanda sa miaging tuig.

Nasayran niya nga mas gipili sa mga negosyante og baboy sa Mindanao ang pagtumod sa ilang stocks sa Eastern Visayas kaysa Central Visayas tungod sa kataas sa presyo sa komprada sa taga didto sa naasoy nga supply.

Iyang gipasabot nga sa pagkakaron, ang mga negosyante og baboy sa Eastern Visayas wala pa makabangon sa hingpit, hinungdan nga walay makasupply sa naasoy nga palaliton.

Subay niini, si Tambago miingon nga ila nang nasigpatan ang pagsaka og labing minus P10 sa presyo matag kilo sa karneng baboy sa kamerkadohan dinhi sa Sugbo gikan sa P190 ngadto na sa P200 matag kilo.

Gituohan nga mahibalik lamang ang normal nga presyo sa baboy kun makabangon na ang mga hog raiser sa Leyte ug Samar.

Sa laing bahin, iyang gipahibawo nga namatikdan usab nila ang pagnihit sa supply sa itlog sa merkado hinungdan sa pagsaka usab sa presyo niini.

Kini tungod kay wala pa usab makabalik sa normal nga operasyon ang mga industriya sa poultry didto sa Bantayan Island nga maoy nagsilbing capital sa supply sa itlog sa merkado sa lalawingan sa Sugbo ug ubang probinsiya sa Visayas.

Image Credit: www.trekearth.com