Pag-Review Sa Gahum sa RTWPB, Suportado sa Labor Sector

Gisuportahan sa labor sector ang sugyot nga reviewhon sa kongreso ang gihatag nga gahum niini ngadto sa Regional Tripartite Wages and Productivity Board(RTWPB).

Kini aron manubag usab ang mga government representatives nga magpasagad sa ilang katungdanan isip membro sa RTWPB.

Matud pa ni Atty. Ernesto Carreon nga alang kaniya nawad-an na og kahulogan ang pag-umol sa kongreso sa wage board tungod kay ingon sa madektahan ra ang mga representante niini nga mga opisyal sa kagamhanan sa mga pribadong negosyante.

Iyang gitataw nga mas maayo usab nga matan-aw sa kongreso kun angayan ba nga manubang ang hingtungdang mga opisyal sa RTWPB kun masayop ang ilang desisyon.

Ang RTWPB gilangkoban sa mga representante sa Department of Trade and Industry(DTI), National Economic Development Authority(NEDA) ug sa Department of Labor and Employment(DOLE) isip vice chairman ug chairman ang usa ug usa sa hunta sa RTWPB.

Matud pa niya, giisip sa mga tigpaniid nga gipaboran sa RTWPB ang mga negosyante kinsa maoy nagbuot nga ang binuwan ra nga allowance sa mga trabahante ang angay nga umentohan ug dili ang binuwan nga suhol.

Sa katarungan nga naalakanse ang mga negosyante sa miaging tuig gumikan sa mga kalamidad busa mibungat sila nga allowance ray umentohan ug dili ang binuwan nga suweldo. Nakapangutana ang mga trabahante kun ang mga negosyante ra bay naapektohan sa maong mga katalagman.

Dugang pa ni Carreon nga namatud-an sa mga mamumuo nga mipabor ang taga gobyerno sa sugyot sa mga negosyante ug wala paminawa ang hangyo sa mga trabahante.