TRO sa Warwick-Barracks, Gisalikway sa Korte

Gisalikway sa hukmanan ang gipangayo sa 16 ka pamilya nga kanhi nagpuyo sa Warwick-Barracks nga papugngan unta ang dakbayan sa Sugbo pagpapahawa kanila gikan sa gipuy-an nila nga merkado sa Barangay Ermita.

Matud ni Cebu City Legal Officer Jerone Castillo nga wala ihatag ni Regional Trial Court (RTC) Judge Gilbert Moises ang gipangayo nga Temporary Restraining Order (TRO) sa mga molupyo sa Warwick-Barracks.

Matud pa, nakasabot si Moises nga kadtong mga tinuod g’yud nga naninda sa Warwick-Barracks hatagan og luna sa mga opisyal sa dakbayan sa Sugbo nga ilang kabalhinan sa pagpaninda diha sa palapdan nga Freedom Park market.

Ang nahimutangan sa dalan El Filibusterismo, ang karsada nga nag-uwang sa Freedom Park Market ug Warwick-Barracks, isibog ug adto na mag-agi sa luna nga sakop na sa Warwick aron sa tumong nga modaku ang Freedom Park alang katindahan.

Matud ni Mayor Rama nga kadtong tinuod g’yud nga mga tindera pahatagan niya og luna nga makapadayon pagpaninda, apan kadtong mga mitarok lang og balay nga wala maninda, dili na sila pabalikon pa.

Si Castillo miingon nga ipadayon pa ang paghusay sa kaso apan gibasura ang gipangayo nga TRO sa mga illegal occupants.