Pag-IBIG Office Gibuksan sa Tagbilaran

Gibuksan na ang Tagbilaran Branch sa Pag-IBIG Fund sa maong dakbayan.

Matud pa ni Pag-IBIG Senior Specialist Leonardo Cirujales sa iyang pakighinabi sa mga tigbalita nga ang extension office sa Pag-IBIG Fund didto sa lalawigan sa Bohol usa na ka sanga sa buhatan sa Pag-ibig.

Miingon si Carujales nga ang Bohol One Stop Shop (BOSS) maoy naningkamot nga makatabang og daku sa Pag-ibig sa pagkab-ot sa gikinahanglang 50,000 ka mga miyembro aron mahimong full branch.

Tungod niini, ang mga miyembro sa Pag-IBIG mahimo nang mo-file sa ilang mga claims ug mo-apply sa ilang Multi-Purpose Loans didto sa ilang sangang-buhatan nga adto ipahimutang sa Galleria Luisa, sa dakbayan sa Tagbilaran.

Midugang siya nga ang probinsiya sa Bohol maoy mahimong pilot sa bag-ong loyalty card program sa maong buhatan diin ang pagpa-rehistro ug impormasyon alang sa kaayohan niini makuha sa Kiosk nga ilang ibutang sa Human Resource Management and Development Office (HRMDO) sa Kapitolyo.

Dugang pa ni Carujales nga kining labing ulahing kalambuan kabahin usab sa tumong sa Pag-IBIG nga makatubag dayon sa mga panginahanglan sa mga miyembro niini ug mahimong aktibo nga magdudula sa kaugmaran sa lalawigan sa Bohol.