DENR Misusi sa Dump Site sa Talisay

Ang Department of Environment and Natural Resources (DENR)7 nagpadala og technical team ngadto sa syudad sa Talisay aron sa pagsusi sa dump site nga gikatahong mibuga og ‘methane gas’ tungod sa pagkasunog sa mga basura.

Mao kini gitug-an sa tigpamaba sa DENR-7 nga si Dr. Eddie Llamedo kinsa nagkanayon nga ang katuyoan sa nahisgutang technical team sa pag-adto sa barangay Tapol syudad sa Talisay mao ang pagsusi sa kalapad sa kadaut mugna sa giingong methane gas gikan sa naglaundok nga basura.

RA 9003

Si Llamedo niingon nga ila usab nga gisuta kun hingpit bang natuman sa kagamhanan sa syudad sa Talisay ang tanang mga gipangayong panginahanglan nga nalatid sa Republic Act 9003 nga naila nga “Ecological Solid Waste Management Act of 2000” sa pagtukod sa sanitary land fill sa maong dakbayan.

Matud pa ni Llamedo nga ang paggawas sa methane gas gikan sa dump site makadaut kaayo sa panglawas sa mga residente sa maong barangay.

Nahadlok Masakit

Nasayran nga ang kapitan sa barangay Tapol nga si Kapitan Mary Ann Nolasco miingon nga may 70 na ka mga basurero ang namahawa tungod sa bagang aso gikan sa nasunog nga mga basura ug nahadlok nga sila magmasakit.

Iyang gipahibawo nga ang pag-aso sa basura nagsugod niadto pang Pebrero 22 ning tuiga ug wala gyud mapawong bisan pa man og gibuboan na og tubig sa kagamhanan sa syudad sa Talisay.

Patabunan ni Mayor JVR

Kini usab ang hinungdan nga si Mayor Johnny Delos Reyes naglaraw nga tabunan og anapog ang maong basurahan sa labing daling panahon aron dili na kini moaso ug dili na usab makahatag og kadaut sa panlawas sa mga molupyo sa nahisgutang lugar.