Minahan sa Danao Gisusi sa DOE, DOLE

Ang Department of Energy(DOE)-7 hingpit na nga mimando sa pagpahunong sa operation sa minahan sa SKI Energy Resources Inc. (SERI) Mining Corporation didto sa barangay Dunga syudad sa Danao human kini mihulpa niadtong Sabado diin usa ka minero ang patay ug tulo ang angol.

Mipadala na usab ang DOE og mga imbestigador nga gipangulohan ni Ed Amante aron pagsusi sa hinungdan sa pagkalusno sa maong minahan.

Si Amante nagkanayon nga base sa gipakanaug nga suspension order sa operation sa maong mining company, wala nay bisan kinsa nga gitugotan nga makasulod sa naasoy nga minahan.

Matud niya nga ila usab nga pakigsultihan ang 13 ka mga minero nga naluwas sa maong trahedya aron pagsuta sa tinuoray nga hitabo sa wala pa mahugno ang maong minahan.

Giangkon hinuon niini nga ang CERI Mining Corp. nakarehistro sa ilang buhatan ug gitugotan nga makahimo og mining operation sa nahisgutang lugar.

Samtang gibalikan sa pagbisita sa Department of Labor and Employment (DOLE-7) ang maong minahan human sila babagi sa pagsulod ang ilang mga labor inspectors niadtong nakalabay nga adlaw.

Sigon sa tigpamaba sa DOLE-7 Emmanuel Ferrer nga human gyud sa maong insidente ang labaw sa ilang buhatan mipadala dayon og usa ka team sa inspectors nga gipangulohan ni Greg Diaz aron pagsusi kun gituman ba ang safety measures sa kompanya alang sa kaluwasan sa mga minero.

Gitug-an niini nga gisuta sa naasoy nga mga inspectors kun wala bay kalapasan sa katungod sa mga mamumuo ang suholan sa naasoy nga mga minero.

Kini human usab mitug-an si Danao City Mayor Ramon “Nito” Durano nga pakyaw-pakyaw system ang paagi sa pagpanuhol aron daling mahuman ang trabaho.

Sa higayon nga makita nila ang kalapasan sa katungod sa mga minero, ang DOLE mohimo usab og tukmang lakang batok sa naasoy nga mining company.

Image Credit: www.philstar.com