182 ka Driver, Sikop

Dul-an sa 200 ka drayber og mga garbage trucks sa dakbayan sa Sugbo nadakpan tungod sa paghakot og basura nga wala gilain ang mga malata ug ang dili malata.

Si Grace Luardo, hepe sa Cebu City Environmental Sanitation Enforcement Team (CESET), mipasabot nga igo lang sila nga mipatuman sa kamandoan ni Mayor Michael Rama.

Citation Ticket

Hangtod kagahapon, 182 na ka drayber og mga garbage truck ang gipang-isyuhan og citation tickets human nga estrikto na g’yud nga gipatuman sugod kaniadtong Sabado ang hugtanay nga kampanya alang sa tukma nga paghipos sa mga basura.

Tungod sa hugtanay nga pagpanakop sa mga drayber sa garbage truck nga naghatod og basura nga wala ma-segregate didto sa pribado nga landfill sa Barangay Polog, Consolacion, duha ka sakop sa CESET ang gihulga sa usa ka drayber sa Departmnent of Public Services.

Hulga

Matud ni Luardo nga ang drayber sa DPS garbage truck nga si Florante Ardenio mihulga sa duha ka kawani sa CESET didto sa landfill sa Consolacion pinaagi sa pag-ingon nga kun sila mag-inistrikto pag-ayo tua ra ba sila sa bukid nga dili ilang lugar.

Gisumbong ni Luardo ngadto ni Mayor Rama ang gihimo sa mao nga drayber sa DPS hinungdan nga ang mayor wala malipay sa gihimo ni Ardenio ug iya kining paadtoon sa City Hall karong buntag.

Daan na nga nagpahibalo si Mayor Rama ug DPS Chief Rolando Ardoza nga sugod Marso 1 dili na ipahakot ang mga basura nga wala ma-segregate.

Apan ang mga garbage truck sa DPS, labi na g’yud sa kabarangayan, wala motuman sa mando ug nagsige gihapon og hakot sa mga wala ma-segregate nga basura.

Matud ni Luardo nga gikan kaniadtong Sabado, pito pa lang ka garbage trucks ang naghakot og mga gi-segregate nga mga basura ang uban gasagol-sagol lang.

Ang Inayawan Sanitary Landfill adto ang ubang gagmay nga garbage truck mohatod og basura gikan sa mga barangay aron ibalhin sa dagko nga garbage trucks sa DPS nga mao na ang mohatod ngadto sa Consolacion.

Matud ni Luardo nga sa 182 ka drayber nga naisyuhan og citation tickets, 34 niini mga drayber sa DPS samtang ang uban sa mga barangay.

ABC

Si Konsehal Philip Zafra, presidente sa Association of Barangay Councils (ABC) ug kapitan sa Barangay Tisa, dakbayan sa Sugbo, pabor nga estriktohon g’yud sa pagpanakop ang mga drayber sa garbage truck aron sila matudloan og leksyon.

Ang lagda nga gilatid sa Republic Act 9003, ang Ecological Solid Waste Management Act, nagkanayon nga ang mga wala ma-segregate nga mga basura dili hakuton, aron ang mga tag-iya sa basura makat-on og leksyon ug ilang lain-lainon ang mga malata ug dili malata.

Base sa balaod, dakpon kadtong dili motuman, apil ang mga opisyal sa kagamhanan nga dili mopatuman sa balaod, pasakaan usab og kaso sa hukmanan.