Organ Donor Record, Nalabwan sa Pilipinas

Nalabwan na sa Pilipinas ang Guinness World Record nga “Most People to Sign-up as Organ Donor in One Hour.”

Kanhi gikoptan sa nasud nga India ang maong titulo nga adunay 2,755 donors nga nipasalig isip organ donors sa usa ka lugar sulod sa usa ka oras.

Pinaagi sa sign-up campaign nga “I Am Life Line” sa Department of Health (DOH) ug Philippine Network for Organ Sharing (PhilNOS), nahimo sa mga Pinoy nga malabwan ang record sa India.

Kapin sa 3,000 dayon ang natala sa Polytechnic University of the Philippines (PUP) sa Sta. Mesa, Manila ang nagpalista isip donor sulod pa lamang sa tunga sa oras.

Gawas sa one hour record, target usab nga makuha sa mga Pinoy ang pinakadaghang ‘pledge’ nga mo-donate og organ sa usa ka nasud sulod sa usa ka adlaw.

Apil sa mga nagpahigayon og organ donation sign-up ang Quezon Memorial Circle (QMC); RTMC Hospital sa San Fernando, La Union; Mamba Gym sa Tuguegarao City, Cagayan; JMR Coliseum sa Naga City ug Almendras Gym sa Davao City.

Paaboton na lamang ang pormal nga pahibalo sa mga tinugyanan sa Guinness kalabot sa world record attempt sa organizers.

Image Credit: www.scmp.com