PNP Manawat og Sibilyan nga Aplikante

Gibuksan sa Philippine National Police (PNP) sa mga sibilyan ang halos 7,500 ka bakanteng posisyon sa buhatan.

Matud pa ni PNP-Public Information Office (PNP-PIO) Chief Sr. Supt. Reuben Theodore Sindac, kinahanglan karon sa PNP ang halos 7,500 ka non-uniformed personnel nga mo-alagad isip computer encoder ug radio operator sa nagkalain-laing front line police station sa nasud.

Giingong ang mga kanhi administrative o clerical works nga gihimo sa kapolisan angay nang buhaton sa mga civilian employee.

Base sa gi-aprobahang memorandum ni Interior and Local Government (DILG) Secretary Mar Roxas kang Presidente Benigno ‘Noynoy’ Aquino III, kinahanglang pun-an ang mga posisyon sa dili pa moabot ang bulan sa Hunyo ning tuig.

Giingong tuyo sa reporma nga mapatuman ang mga organic PNP personnel nga buhaton ang ilang aktwal nga police duty imbes nga magpabilin lamang sa mga opisina.

Gipasabot ni Sindac nga dili na kinahanglan pang moadto sa mga intresadong sibilyan sa Kampo Crame tungod kay mahimo silang moadto sa frontline sa mga estasyon sa polis.

Ang application form anaa sa mga police station sa mga probinsya, sa mga munisipyo diin magpuyo ang aplikante.

Giingong dawaton lamang sa partikular nga estasyon sa polisya ang mga aplikante nga nagpuyo duol mismo sa mga nasakopan nga lugar.

Gitataw ni Sindac nga dili kinahanglang nakalampos sa PNP Academy aron madawat sa mga bakanteng posisyon ilabi na sa mga clerical work.

Samtang sa mga mo-apply isip radio operator, kinahanglan lamang adunay kahibalo sa radio technical operations.

Sa mga interesadong mo-apply isip crime registrar, mahimong wala nakahuman sa kolehiyo tungod kay kinahanglan lamang nga adunay diploma sa Computer Study ug kahibalo sa basic Civil Service.

Aron usab makasulod isip admin staff, kinahanglang nakatapos og basic courses sa kolehiyo.

Alang sa dugang detalye kalabot niini, mahimong bisitahon lamang ang ilang website nga www.pnp.gov.ph