Konseho Mikonpirmar na sa Katungdanan ni Mercado

Gikonpirmar sa mga konsehal sa dakbayan sa Sugbo ang pagkatudlo ni Dr. Lucelle Mercado isip bag-ong City Administrator.

Si Mercado, asawa ni Metro Cebu Water District (MCWD) Chairman Rene Mercado, gitudlo ni Mayor Michael Rama nga maoy magsilbi nga “little mayor” nga mopatuman sa tanan niya nga kamandoan.

Matud ni Mercado nga aduna siya’y kasinatian kabahin sa “management” tungod kay siya nangunay sa pagdumala sa iyang mga patigayon ug gihulagway niya nga susama ra kini sa pagdumala sa dakbayan.

Gisaad ni Mercado ngadto sa mga sakop sa Cebu City Council nga himoon niya ang tanan aron epektibo siya sa katungdanan pagserbisyo sa katawhan.

Gawas sa pagka city administrator, si Mercado nagdumala ug sakop pa siya sa pito ka “commissions” sa dakbayan sa Sugbo, usa niini mao ang pundok nga gitugyanan sa pagpahapsay sa mga aseras.

Si Vice Mayor Edgardo Labella mipasabot nga katungod sa mayor kun kinsa ang iyang itudlo nga city administrator kang kansang katungdanan magdepende sa kabubot-on sa nagtudlo kanila.

Ang mayor adunay katungod paghukom kun hulipan ba niya ang mga tinudlo niya nga opisyal nga co-terminous sa iyang katungdanan.

Image Credit: Cebu City PIO