Bisan sa Katalagman, Ekonomiya sa Nasud Lig-on; Misaka og 7.2 Porsento

Nagpabiling lig-on ang ekonomiya sa Pilipinas taliwala sa dakung hagit sama sa mga miaging kalamidad ug uban pang matang sa katalagman.

Matud pa ni Elvira C. Bongosa, usa sa mga tigpamaba sa Philippine Information Agency 7 (PIA-7, nga gipahayag ni Chairman Arsenio Balisacan sa National Economic Development Authority (NEDA) nga padung na kita sa katumanan sa kalampusan sa atong ekonomiya sumala sa gilaraw sa Philippine Development Plan sa tuig 2011-2016.

Dugang pa ni Balisacan nga luyo sa nagkalain-laing katalagman nga miigo sa nasud sa naghinapos ang tuig 2013, ang ekonomiya sa Pilipinas misaka og 7.2 porsento labaw og 6.8 porsento kay sa nakab-ot sa tuig 2012.

Midugang si Bongosa nga kinahanglan pa gihapon ang mga dagkung lakang aron makunhoran ang kakabus dungan sa paghatag og de kalidad nga trabaho ug oportunidad.

Miingon siya nga usa ka updated Philippine Development Plan ang gihikyad sa goberno nga mosiguro sa pagkab-ot sa umento sa ekonomiya.

Nahisulod dinhi ang pagpakunhod sa kakabus sa kapin sa 16 porsento ug 17 porsento sa underemployment sa 2016.

Matud ni Bongosa nga may gihimo na usab nga uban pang lakang ang goberno alang sa pagkab-ot sa inclusive growth.

Apil na niini ang pagpa-ubos sa kategoriya sa mga lalawigan base sa ilang panginahanglan ug epekto sa kalamidad ug uban pang matang sa katalagman.

Image Credit: www.filipinovirtuallawyers.com