Board Member Miawhag sa DENR 7: I-Kanselar ang MOA, SAPA

Giawhag ni 5th District Provincial Board Member Jude Thaddeus Durano Sybico si DENR-7 Executive Director Isabelo Montejo nga imbestigahon ang gikatahong pagpamutol sa gatosan ka punoan sa kahoy nga pagatpat sa baybayon sa barangay Unidos lungsod sa San Francisco sa isla sa Camotes.

Ang maong panawagan gibase sa gipagawas nga cease and desist order nga giluwat ni San Francisco mayor Aly Arquillano ngadto kang Pacito Relampagos aron hunongon nini ang pagpamutol sa mga punoan sa pagatpat.

Matud pa ang maong kamanduan gibaliwala lamang ni Relampagos tungod sa gihuptan niini nga Memorandum of Agreement ( MOA) uban sa DENR-7 pinaagi sa gitawag nga Special Agreements for Protected Areas (SAPA) alang sa pag-ugmad sa naasoy nga lugar niadtong Enero 14 niining tuig 2014.

Matud pa ni Sybico nga ang nakita niyang pagpamutol sa mga punoan sa pagatpat klaro kaayong kalapasan sa balaod nga naghatag og kadaot sa “Shoreline Protection, Mangrove Rehabilitation and Bathing Establishment sa nahisgutang lugar.

Tungod niini, giawhag ni Sybico ang mga opisyal sa DENR-7 sa pagkanselar sa MOA nga ilang gitunol ni Relampagos ug ipatuman ang
tukmang silot ngadto sa nahisgutan nga developer sa higayon nga makakita kini og igong ebidensiya.

Ang maong lakang gisuportahan usab ni Vice Gov. Agnes Magpale base sa kawsa ug baruganan sa kagamhanan nga tatawng nagproteher sa kalikupan.