Apektado sa Kalamidad, Himoung kabahin sa Pagsaulog sa EDSA People Power

Himuong kabahin sa pagsaulog sa ika-28 anibersaryo sa EDSA People Power Revolution ang mga apektado sa mga miaging kalamidad.

Sumala ni Philippine Information Agency (PIA)7 Elvira C. Bongosa, nga gusto ni Presidente Aquino nga mahimong parte sila sa usa sa labing mahinungdanong kasaulogan sa kasaysayan sa Pilipinas, pinaagi sa pagbisita niya aron sud-ongon ang kahimtang sa gipatumang rehabilitasyon sa gobyerno.

Matud pa ni Bongosa nga lakip sa bisitahon nga lugar sa Pamuno Nasud atol sa kasaulogan sa EDSA People Power Revolution sa sunod semana mao ang Cateel, Davao Oriental alang sa rehabilitasyon sa bagyong Pablo, Eastern Samar tungod sa bagyong Yolanda ug ang Loon, Bohol nga nasabak sa linog.

Samtang nagkanayon si Bongosa nga sa unang higayon, saulogon sa Cebu ang usa sa labing mahinungdanong parte sa selebrasyon sa EDSA: ang ‘Salubungan’.

“Nahimo naman gud nga makasaysayan ang Mt. Carmel sa Cebu, usa sa mga lugar nga gibistahan kaniadto si kanhi Presidente Corazon Aquino” , sumala ni Bongosa.

Makahuloganon kaayo ang kasaulogan sa EDSA diin nasuta ang panaghiusa sa mga Filipino niadtong Pebrero 1986 , sumala sa presidente sa nasud.

Midugang si Bongosa nga molibot ang Presidente sa mga apektadong lugar atubangan na usab sa mga pagsaway nga giingong hinay ang tabang sa gobyerno sa mga lugar nga gihamok sa mga katalagman.

Hinuon prayoridad sa administrasyong Aquino nga ibalik sa normal nga panginabuhi sa mga pamilya sa lugar nga naigo sa mga kalamidad.