DOT: Turista sa Nasud Midaghan sa Tuig 2013

Ang sector sa turismo sa nasud mitala og 9.56 porsento nga umento sa gidaghanon sa tuig 2013 kun itandi sa tubo niini sa tuig 2012.

Gipasabot ni Elvira Bongosa, tigpamaba sa Philippine Information Agency (PIA 7) nga bahin sa kinatik-ang kinitaan sa maong sector, mikabat sa P186.15 bilyones ang kita niini sa maong tuig.

Kini luyo sa nagsunod-sunod nga mga dagkong katalagman nga gisubang sa nasud sa tuig 2013.

Matud ni Bongosa nga gibutyag sa Department of Tourism (DOT) nga sa tuig 2013, natala ang 4,681.307, ang katibuk-ang gidaghanon sa mga mibisita dinhi sa nasud ug nalabwan pa niini ang 4,272,811 nga mga bisita niadtong tuig 2012.

Gani matud pa ni Bongosa nga natala usab ang highest growth rates sa mga bulan sa Pebrero (15.8%) Hunyo (14%) ug Agosto (13%).

Gitug-an ni Bongosa nga si Tourism Secretary Ramon Jimenez Jr., gibati og kalipay tungod sa kahapsay sa performance sa Pilipinas niadtong Disyembre human ang pagpanghasi sa bagyong Yolanda sa Kabisay-an.

Kini tungod sa pag-abot sa mga tabang gikan sa nagkalain-laing nasud ug organisasyon sa gawas alang sa pagpabangon sa Pilipinas gikan sa mga miaging kalamidad.

Midugang si Bongosa nga sa mga langyaw nga turista, nagpabiling labing daghan ang mga Koreano nga adunay 1.17 milyones ang miduaw dinhi sa nasud.

Gisundan kini sa mga Amerikano nga adunay 674,564; Japan-433,705; China-426,352; ug Australia-213,023.

Miingon usab si Bongosa nga base sa gipahayag ni Jimenez, nga daghan pang oportunidad sa turismo ang mahikyad karong tuiga gikan sa mga programa nga gipatuman ubos sa National Tourism Development Plan sa goberno.