Driver sa Gobyerno Bansayaun Usab sa LTO, LTFRB

Gisuportahan sa mga bus ug mini bus operators dinhi sa lalawigan sa Sugbo ang kasabutan sa Land Transportation Office (LTO)7 ug Land Transportation Franchising and Regulatory Board (LTFRB)7 nga ipaubos sa subsob nga training ang tanang mga driver sa mga bus ug mini bus sa Sugbo.

Kini aron masiguro ang kaluwasan sa mga pasahero ug malikayan ang dugang disgrasya sa mga bus sa kadalanan sa kalungsoran.

Apan gitataw ni Cebu South Mini Bus Operators Association president Jolito Flores nga apilon usab sa training sa LTFRB ang mga driver sa sakyanan sa gobyerno.

Gitug-an ni Flores nga dili lamang ang mga pribadong mga bus ang nadisgrasya sa kadalanan sa kalungsoran nga mikalas usab og ubay-ubay nga kinabuhi kundili apil na usab ang mga sakyanan sa gobyerno.

Sumala pa ni Flores nga iyang nakita nga angayan usab nga ipaubos sa training ang mga driver sa gobyerno, tungod kay makadaghan na silang nakakita og mga Kaohsiung Bus nga mibiyahe paingon sa kalungsoran sa lalawigan sa Sugbo nga magdala usab og daghang mga pasahero.

Gitataw ni Flores nga wala silay problema, busa ilang gisuportahan ang ipatuman sa LTO ug LTFRB nga walay balibaray nga training sa mga driver sa mga bus aron madisiplina usab ang mga driver niini.

Kini tungod kay sagad sa mga hinungdan sa nahitabong mga aksidente sa kadalanan mao man ang human error o kasaypanan sa driver.

Gani iyang gipahibawo nga pipila sa ilang mga driver gipadala nila ngadto sa TESDA alang sa tukma nga pagbansay aron nga maatiman ug maampingan ang ilang mga sakyanan.

Dugang pa ni Flores nga dako ang iyang pagtuo nga sa bag-ong lagda nga ipatuman sa LTO ug LTFRB makabaton og mga disiplinadong driver sa bus ug mga mini bus dinhi sa Sugbo.