IBP: Abogado Dili na Kinahanglang Pa-Armasan

Mitumaw na usab ang tinguha nga padad-on og armas ang mga abogado human banhigi patay si Atty. Noel Archival didto sa barangay Corro lungsod sa Dalaguete niadtong Martes sa hapon.

Ang presidente sa Integrated Bar of the Philippines (IBP) Cebu Chapter nga si Atty. Mae Elaine Bathan nitug-an sa mga sakop sa Metrocebu News nga daghan sa mga abogado sa Sugbo ang nabalaka karon sa ilang seguridad.

Apan gitataw ni Bathan nga dili na angayan nga hingusgan pa ang maong panawagan nga gikinahanglan nga magbaton og armas ang mga abogado alang sa kaugalingong siguridad niini.

Kini tungod kay ubay-ubay na sa ilang mga sakop ang may armas na human niadtong nahitabong pagpamosil sa usa ka langyaw didto sa sulod sa korte nga mipatay ug piskal ug doktor.

Gipasabot hinuon ni Bathan nga ang hugot nga seguridad nga ipatuman sa kapolisan maoy mas labing gikinahanglanon aron maprotektahan ang mga abogado ug ubang mga tawo.

Laing misupak sa lakang nga armasan ang mga abogado mao si Cebu City Mayor Mike Rama ug kanhi magsisibya Atty. Ariel Bacatan.

Sigon pa nila nga ang labing maayong armas mao ang pagtinarong sa practice niini ug ang pagtamod kanunay sa Code of Ethics sa abogasiya.