PNoy Misuporta sa Hukom sa Korte Suprema

Suportado ni Presidente Benigno ‘Noynoy’ Aquino III ang desisyon sa Korte Suprema nga uyon sa Batakang Balaod ang Cyber Libel nga nahisulod sa Cyber Crime Prevention Law.

Atubangan kini sa kahadlok sa pipila ka online journalists, netizens ug bloggers nga hilig magkomento sa Twitter ug Facebook tungod kay giingong pagpanglapas sa katungod sa pamalita.

Sumala sa tigpamaba sa Philippine Information Agency(PIA)7 nga si Elvira C. Bongosa nga gipasabot ni PNoy nga wala kini itumong nga limitihan ang katungod sa tigbalita apan regulasyon lamang kini aron malikayan ang pag-abusar sa uban.

Midugang si Bongosa nga nagkanayon si PNoy nga ang matag katungod adunay kalambigit nga responsibilidad aron pagprotiher sa katungod sa uban.

Matud ni Bongosa nga dili usab maayo alang sa taga media nga adunay exempted sa maong balaod.

Ang kaso nga libel kasagaran masugatan sa taga media ug sa online journalism, sumala ni Bongosa.

Sumala niya nga gitakda usab nga moduso og motion for reconsideration ang mga petitioner sa kaso sa Cyber Law nga gideklarar sa Supreme Court (SC) nga constitutional ang probisyon niini.

Una niini, gi-deklarar sa Korte Suprema nga “constitutional” o nahiuyon sa Konstitusyon ang kontrobersyal nga online libel provision sa Cybercrime Law o ang Republic Act 101-75 o Cybercrime Prevention Act of 2012.