BOC: Smuggler Lisud Dakpon

Luyo sa migrabi kakusog nga rice smuggling sa dakbayan sa Sugbo, wala gyuy nadakpan nga smuggler ang mga tinugyanan sa Bureau of Customs(BOC) dinhi sa dakbayan.

Giangkon kini kagahapon ni Atty. Paul S. Alcazaren, OIC District Collector sa BOC Cebu, sa tulumanon AGIO Forum didto sa buhatan sa Philippine Information Agency(PIA)7.

Matud ni Alcazaren nga ang kaabtik sa mga smuggler maoy nakahimo kanilang gawasnon sa mga krimin nga angay ipasaka batok kanila.

Hinuon ang mga pinayuhot nga bugas humay nga nasakmit sa mga otoridad sa BOC Cebu ug gipamaligya na ngadto sa publiko mikabat og kapin sa P79 milyones gikan niadtong Hunyo 6, 2013 hangtud sa Septembre 19, 2013.

Gipasabot ni Alcazaren nga nasakmit kining maong mga sinakong bugas nga way permiso gumikan sa kaabtik sa mga tinugyanan sa BOC.

Apan luyo sa ilang kaigmat, mas labaw nga abtik ang mga smuggler tungod kay walay ngalan sa tawo sa mga papeles nga mini sa mga kargamento nga masakmit.

Matud pa ni Alcazaren nga mga ngalan sa korporasyon ang isuwat nila sa dokumento, busa maglisud pagsikop og tawo ang taga BOC.

Giangkon usab ni Alcazaren nga dili sila makapasalig nga masumpo ang rice smuggling luyo sa kahigpit sa balaod niini.

Kini tungod kay daghan kaayo nga kakunsabo ang mga smuggler nga mga kompaniya ug mga tawo.

Nasayran nga matag semana mokabat sa 50 mil tonilada sa mga sinakong bugas nga modunggo sa nagkalainlaing pantalan sa nasud nga gipayuhot gikan sa gawas.

Apan giangkon ni Alcazaren nga mahunong lamang kini kun ang tanang tawo mosumbong sa mga otoridad sa BOC matag higayon nga makadiskobre sila og mga butang nga pinayuhot.