LTO 7: Driver nga Way Training, Dakpon

Hingpit na nga ipatuman ang balaod sa pag-sikop sa mga driver nga wala’y hustong training o pagbansay sa pagmaniho og sakyanan.

Kini base sa bag-ohay lamang napirmahan nga Memorandum of Agreement (MOA) tali sa Land Transportation Franchising and Regulatory Board (LTFRB)7 ug Land Transportation Office (LTO)7.

Ang namirma sa nahisgutang kasabutan mao sila si LTFRB-7 Regional Director Ahmed Cuizon ug LTO-7 Regional Director Arnel Tancingco, kinsa mingon nga ilang dakpon ang mga driver nga molapas sa balaod.

Ang duha ka mga opisyal mipasabut atol sa interview sa mga sakop sa media nga sugod karong semanaha dili tugotan ang usa ka driver sa bus nga makamaneho kun wala kini tukmang training.

Kini aron masiguro nga makahibawo kini sa mga angay buhaton ug angay likayan sa pagmaniho og sakyanan sa kadalanan.

Matud ni Cuizon ug Tancingco nga ang nag-unang katuyoan sa maong kasabutan mao nga malikayan ang sunodsunod nga trahedya sa bus didto sa kaulohan, diin nalakip sa pagkamatay ang usa ka sikat ang comedian ug actor nga si Ervin Jimenez nga naila pag-ayo sa ngalan nga “Tado.”

Midugang sila si Cuizon ug Tancingco nga malakip usab sa maong lagda ang mga driver sa mga pribadong mga sakyanan dinhi sa Sugbo ug ubang mga probinsiya sa Central Visayas.

Dugang pa nila nga may bug-at nga silot nga ipahamtang batok sa mga driver nga makalapas sa nahisgutang lagda nga gilusad sa duha ka buhatan sa kagamhanan.