DSWD Milusad sa “Adoption Consciousness” Week

Ang Department of Social Welfare and Development (DSWD)-7 ug ubang ahensya nga kauban niini nanguna sa usa ka motorkada alang sa pagtamod sa kasaulogan sa ‘Adoption Consciousness Week’ gikan sa Pebrero 18 hangtud 24, 2014.

Ang maong kasaulogan may tema nga “Legal na Pag-aampon sa Lahat ng Pagkakataon,” sumala ni Leah Quintana, DSWD-7 Information Officer.

Gibutyag usab ni Quintana ang ubang mga kalihukan nga gitakda alang sa kasaulogan sa Adoption Consciousness Week sama sa poster making contest unya sa Pebrero 21 nga salmotan sa SOS Children Village Cebu, Inc., Antonio de Aviedo, Children Shelter, Pari-an Drop-in Center, RSCC, Albert Sweitzer Familienwerk Foundation, Inc., ug sa Franciscan Sisters of Sacred Heart Children’s Home, Inc.

Matud pa ni Quintana nga sa Pebrero 23, ang usa ka adoption help desk ipahigayon didto sa Elizabeth Mall aron manubag sa mga pangutana bahin sa legal adoption.

Ang lamesa magsilbi usab nga sentro sa pagpalig-on sa legal adoption awareness, agi og suporta sa tema sa kasaulogan niining tuiga bahin sa “Legal na Pag-aampon sa Lahat ng Pagkakataon,” dugang pa ni Quintana.

Ang kasaulogan may tinguha usab sa pagdugang sa pagpakabana bahin sa adoption lakip na sa pamaaagi ,panginahanglan ug mga kaayohan ug epekto niini sa mahinungdanong lugar nga kanunay nga suroyanan sa publiko pinaagi sa media.

Matud pa ni Quintana nga tuyo usab sa maong kalihukan ang paghatag og edukasyon sa publiko bahin sa hustong paagi sa adoption.

Pinaagi niini magiyahan usab ang nangita og kasayuran bahin sa paagi sa pagsagop o adoption ug sa pagpabugnaw sa illegal nga pag-usab og ngalan sa bag-ong natawong bata nga aduna nay tinuod nga ngalan, sumala ni Emma Patalinghug, DSWD-7 Children Welfare Specialist.

Sa pagkakaron adunay 68 ka mga bata nga andam na nga ipasagop alang sa taga dinhi o kaha sa taga gawas sa nasud, sumala ni Patalinghug.