Andales: Mga BEO Kinahanglan Makasabot sa Balaod

Gisaway ni Cebu City Councilor Sisinio Andales ang ubang barangaykapitan sa pagtudlo og mga Barangay Environmental Officers (BEO) nga maglisod gani pagsuwat kay masabot nga kuwang usab sila og pagsabot sa balaod nga gitahas kanila nga ipatuman.

Matud ni Andales nga dili unta magpataka og panudlo ang mga kapitan sa kabarangayan og mga sakop sa BEO nga dili kaayo makasabot sa balaod nga buot nila nga ipatuman.

Giawhag ni Andales ang mga BEO nga mobasa sila sa balaod.

Si Grace Luardo, acting chief sa City Environment Sanitation Enforcement Team (CESET) ug supervisor sa mga BEO mibutyag nga nakabantay siya nga adunay mga environmental officers nga maglisod gani pagsuwat.

Ang mga barangay kapitan maoy gitahasan nga motudlo og labing minus lima ka BEO nga idestino ra usab sa ilang tagsa-tagsa ka barangay. Ang mga BEO gihatagan usab og honoraryom gikan sa City Hall.

Gidid-an na ang mga sakop sa CESET ug BEO sa pagdawat og kwarta gikan sa ilang madakpan nga mobayad og amicable settlement nga P500 bugti sa dili na pagpasaka og kaso kanila.

Kadtong mga madakpan sa pagpataka og labay sa mga basura sa publiko nga lugar pasakaan og kaso nga paglapas sa City Ordinance 1361 kun dili sila makig-amicable settlement sa dakbayan.

Kun adto na sa hukmanan sila mohukom nga bakwion ang kaso, ang ilang bayranan mosaka na sa P1,000. Matud ni Luardo nga kadtong mobayad kinahanglan na nga sila ang moadto sa City Treasurer’s Office.

Apan gipasabot ni Luardo nga kinahanglan nga hatagan sila sa CESET og kopya sa resibo nga magmatuod nga ang dinakpan nakabayad na aron dili na sila mopasaka pa og kaso sa hukmanan.