News
Philhealth: Hospital Pamultahon kun Maningil og PF
Mipasidaan ang Philippine Health Insurance Corp. (PhilHealth) nga ilang pamultahon ang mga pampublikong tambalanan nga maningil og professional fee (PF) ug bayad sa mga tambal sa indigent patients o kabus nga pasyente.
Sumala ni Information Officer Elvira C. Bongosa sa Philippine Information Agency(PIA)7, nga sa pagdungog kagahapon sa Senate Committee on Health and Demography kalabot sa Universal Health Care ug sa National Health Insurance Program sa gobyerno, gipahayag ni Atty. Alex Padilla, presidente ug executive chief officer sa PhilHealth, nga gidili ang pagpaningil sa mga kabus nga pasyente agi’g pagsunod sa “no balance billing system”.
Matud ni Bongosa nga ubos sa “no billing system”, giprangka ni Padilla nga dili angay magbayad bisan usa ka sentimo ang mga kabus nga pasyente kun magpatambal kini.
“Ang ibig sabihin ng no balance billing ay wala ho siya (pasyente) dapat binabayaran ni singko for medicines, professional fees or kaya diagnostic. Wala ho siyang dapat gastos,” sumala ni Padilla.
Midugang si Bongosa nga gipasalig sa Philhealth nga sa mismong adlaw sa admission sa pasyente, wala kini angay nga gastohon.
Kun walay available nga tambal nga magamit ang pasyente, mismong ang ospital ang angay mopalit niini o angay hatagan og kwarta ang pasyente aron ipalit og tambal, matud ni Bongosa.
Dugang pa ni Bongosa nga gitataw usab ni Padilla nga ang “no billing system” alang lamang sa mga kabus nga pasyente nga nagpatambal sa mga government hospitals ubos sa ward conditions.
Image Credit: www.timpotter-philippines.com
