‘National Arts Month’ Gisaulog usab Karong Buwana

Gawas sa pagsaulog sa Valentine’s Day ning buwan sa Pebrero karong adlawa sa tibuok kalibotan, isaulog usab ang National Arts Month sa nasud.

Matud pa ni Elvira C. Bongosa information officer sa Philippine Information Agency(PIA)7, nga pangunahan kini sa National Commission for Culture and the Arts (NCCA), diin ang Philippine Arts Festival karong tuiga adunay tema nga: “Art on the Edge.”

Nagkanayon si Bongosa nga gitinguhang i-highlight karong tuiga ang kamaayo sa mga Pinoy sa nagkalain-laing natad sa arte ug kultura sama sa architecture, cinema, dance, literature, music, theater ug visual arts.

Miingon usab siya nga sa pakig-tambayayong sa nagkalain-laing pribadong sektor ug buhatan sa gobyerno, daghang nakaandam nga mga workshops, exhibits, forum, mga pasundayag ug uban pa sama na lamang sa gipaabot nga Second Likha Asya Festival and Conference.

Gawas niini, sumala ni Bongosa nga gikan sa kaulohan, ipasundayag na ang mga programa sa NCCA Philippine Arts Festival sa nagkalain-laing dapit sa Pilipinas.

Gani,gipahigayon ang opening ceremony niini niadtong katapusang adlaw sa Enero sa syudad sa Roxas, didto sa Capiz.

Gibutyag usab ni Bongosa nga gihatagan og pasidungog ang mga Filipino artists nga nakadawat usab og pag-ila sa mga international awards sa gipahigayong ani nga Dangal awarding ceremony niadtong Pebrero 2.

Alang sa kompletong detalye ug petsa sa mga pasundayag sa Philippine Arts Festival 2014, mahimong bisitahon lamang ang ilang website sa www.ncca.gov.ph.

Matud sa tigpamaba sa PIA-7 nga sa pagpakita og pagbaton og maayong abilidad sa mga Pinoy sa arte ug kultura, mahimo kining usa ka dalan aron makab-ot ang tinguhang mapasaka pa ang industriya sa turismo sa atong nasud.

Image Credit: www.dilg.gov.ph