Transaksyun sa Bangko sa 21 ka Barangay, Gi-Suspenso sa COA

Gipasuspenso sa Commission on Audit (COA) ang tanang bank transaction sa 21 ka barangay dinhi sa dakbayan tungod kay ang ilang mga opisyal wala motuman sa lagda nga gilatid sa balaod.

Nagpasabot kini nga hayan apektado ang pagpanweldo sa mga kawani sa mao nga mga barangay kay dili na aprobahan ang pagpa-encash nila og tseke didto sa Land Bank of the Philippines (LBP) nga maoy ilang gidepositohan sa kwarta sa barangay.

Matud ni Philip Zafra, nga maoy presidente sa Association of Barangay Councils (ABC) sa dakbayan, nga wala pa sila masayod unsaon pagsulbad dayon niining mao nga problema.

Nahibaw-an nga aduna diay lagda nga ang mga treasurer sa barangay mohatag og kopya sa tseke nga ilang maisyu ngadto sa COA apan wala nila kini himoa sa taas-taas na nga panahon.

Ang COA nakabantay niini dihang misugod na sila sa paghimo og audit sa mga barangay transactions. Gipaabot nga gawas sa 21 ka barangay, duna pay laing mga barangay nga ilang madiskobrehan nga nakahimo og susama nga kalapasan.

Ang ubang opisyal sa City Hall nagtoo nga nahimo kini tungod kay daghan sa mga gikuha nga treasurer diha sa mga barangay kuwang og kahibawo sa ilang trabaho ug natudlo lang sa mao nga pwesto kay suod sila sa kapitan.

Matud ni Kapitan Zafra nga sila sa Barangay Tisa gi-isyuhan og suspension order sa tanan nila nga bank transaction apan iyang gitataw nga ang kasaypanan wala mahitabo sa iyang administrasyon.

Si Zafra nagsugod pagka kapitan kaniadto lang Disyembre 1 human siya midaug pagka kapitan atul sa barangay elections.

Ang kanhi kapitan mao si Teresita Cabulao, ang asawa ni kanhi kapitan Eddie Cabulao nga gipilde ni Zafra.

Ang Land Bank of the Philippines nakadawat na sa kopya sa suspension orders sa tanang bank transactions sa 2 ka barangay mao nga dili na sila makapa-encash sa ilang tseke para sweldo sa mga opisyal ug kawani.