Sakop sa Ceset, BEO Kinahanglan mo Isyu og Resibo

Ang tanang Barangay Environmental Officers (BEO) ug mga sakop sa City Environmental Sanitation Enforcement Team (CESET) gidid-an na nga modawat og bayad gikan sa ilang madakpan nga magpataka og labay’g mga basura.

Si Grace Luardo, Officer-in-Charge (OIC) sa CESET ug gitahasan ‘sab pagdumala sa mga BEO, gipatambong sa executive session sa mga sakop sa Cebu City Council aron matubag ang reklamo nga sila midawat og bayad gikan sa mga dinakpan apan wala moisyu og “official” nga resibo.

Ang mga konsehal nagbanus-banos pagpangutana ni Luardo og gipasabot nga makasupak ang CESET sa balaod kon padayon sila nga moisyu og “temporary receipt” sa ilang madakpan kay dili malikayan ang pagduda nga mabulsa ra ang ubang kinolekta.

Si Konsehal Nida Cabrera, tsirman sa Committee on Environment sa Cebu City Council, mangayo og kwentada gikan sa City Treasurer’s Office aron mahibaw-an kon pila ang tanang nakolekta sa CESET ug BEO nga naendosar sa panudlanan sa dakbayan.

Matud ni Randy Navarro, nga maoy hepe sa Community Environment Natural Resources Office (CENRO) sa dakbayan sa Sugbo, nga makapadayon gihapon ang mga sakop sa CESET ug BEO sa pagdakop sa mga masakpang magpataka og labay sa mga basura apan dili sila modawat og bayad.

Si Navarro miingon nga kadtong modawat og bayad gikan sa madakpang magpataka og labay sa mga basura, kinahanglan gayud nga mohatag og “official” nga resibo gikan sa City Hall aron pagsiguro nga ang kwarta mahipunta sa panudlanan sa dakbayan.

Matud ni Konsehal Cabrera nga nakadawat siya og daghang reklamo gikan sa nadakpan kay binuhat-buhat ra nga resibo ang giisyu kanila.

Kini maoy rason ni Cabrera nga sutaon gikan sa City Treasurer’s Office kon pila ang kantidad nga na-remit sa mga sakop sa BEO ug CESET.

Si Luardo misaad sa mga konsehal nga tumanon niya ang gitambag kaniya sa mga konsehal.