“Boarding House” Alang sa Iro, Kahayopan, Gitutukan sa Syudad

Ang Cebu City Hall magpahimo og boarding house, apan alang ni sa mga iro, iring ug ubang binuhi nga kahayopan.

Ang tumong niini aron nga kadtong tag-iya niini adunay kabinlan sa ilang mga hayop kon sila mobakasyon sa lagyo nga lugar.

Nakabantay ang kadagkoan sa Department of Veterinary Medicine and Fisheries (DVMF) nga sagad mapasagdan ra ang kahayopan kon ang mga tag-iya mobakasyon mao nga maghimo sila og boarding house.

Kadto hinoong mobilin sa ilang mga hayop niining mao nga boarding house kinahanglang mobayad.

Matud ni City Veterinarian Pilar Romero, nga daghan na nga mga balikbayan ang niduol sa DVMF apan wala pa sila’y maayong pasilidad sa City Abattoir didto sa North Reclamation Area.

Didto sa ubang mga nasud sama sa America, naandan na usab sa mga lumolupyo ang pagbilin sa ilang mga kahayopan sa giingon nga boarding house.

Matud ni Romero nga kun ugaling madayon ang proyekto, aduna g’yud kini bayad apan sabotan lamang sa tag-iya sa hayop ug sa DVMF kun unsaon ang paagi sa pagpakaon ug uban pang kinahanglan sa hayop.

Apan matud ni Romero nga ang maong proyekto nagkinahanglan usab og milyon nga pundo. Gawas niini ila pa usab sutaon asa ang angayan nga dapit aron matukod ang maong boarding center.

Si Cebu City Mayor Michael Rama nakauyon sa maong proyekto og matud niya nga papangitaan niya og lugar sa barangay didto sa bukid nga adto matukod ang boarding house sa mga hayop.