Kampo Hinganlan Ubos Paghinumdum kang Gen. Arcadio Maxilom

Ang kadagkoan sa kapolisan gusto nga dili gayud makalimtan sa mga tawo ang bayanihong buhat ni Heneral Arcadio Maxilom nga nangulo sa mga guerilla dinhi sa Sugbo kaniadto.

Gisugyot sa provincial director sa kapolisan sa Sugbo nga ang bag-o nila nga headquarters nga nahimutang sa Sitio Sudlon, Lahug hinganlan og Camp Arcadio Maxilom.

Ang lakang ni Senior Superintendent Noel Gillamac gitumong aron mahatagan og dungog si Maxilom, kanhi lumad nga taga Tuburan.

Si Maxilom usa ka magtutudlo dihang misulod sa Katipunan nga gipangulohan ni Pantaleon Villegas nga nabantog sa angga nga ‘Leon Kilat’.

Human gibudhian ug gipatay si Leon Kilat sa iyang kauban, si Maxilom na ang nibarog nga lider sa rebolusyon sa Sugbo.

Mipadala siya og sulat ngadto sa mga Katsila nga mo-surrender ang iyang pundok, apan naabtan kini sa pagbaligya sa Espanya sa Pilipinas ngadto sa Amerika.

Si Maxilom namatay didto sa lungsod sa Tuburan human siya maparalisar sa taas nga panahon.

Matud ni Gillamac nga tinguha niya nga nganlan ang maong kampo aron mailhan pa ang maong buhatan sama sa Camp Sotero Cabahug, ang headquarters sa Cebu City Police Office.

Gipadad-an na og sulat ni Gillamac ang mga opisyal sa kapitolyo apan wala pa gihapon niya madawat ang ilang tubag.

Miingon si Gillamac nga lakip sa gipadad-an niya sa iyang suwat mao sila si Gobernador Hilario Davide ug Bise Gobernador Agnes Magpale.