Rama ngadto kang Mercado: Ibanan ang Baho sa mga Publiko’ng Merkado

Gimandoan ni Mayor Michael Rama ang bag-ong Cebu City Administrator nga si Dr. Lucelle Mercado nga pangitaan og paagi nga maminus-minos ang dili maayo nga baho diha sa mga merkado.

Nasayran sa mayor nga usa sa hinungdan nga ang ubang tawo dili ganahan nga mangompra diha sa Carbon Market ug ubang wet market, ilabi na ang Taboan Public Market, mao ang dili maayo nga baho.

Matud ni Mayor Rama nga daghang Hapon ang mitug-an kaniya pag-adto niya sa Japan nga gusto unta sila nga mobisita sa Taboan market aron mamalit og mga buwad, apan nabalaka sila kay madala nila ang baho nga matud pa, mamilit sa ilang sapot.

Nagkatawa ang mga Hapon nga misaysay ni Mayor Rama nga diha’y higayon nga gikan sa Taboan Market mideritso na sila sa airport aron mosakay og abyon balik sa Japan ug nangalimyon ang baho sa mga buwad nga namilit sa ilang gipang sul-ob.

Bisan si Rama wala makahuna-huna og tukma nga paagi aron mawagtang ang dili maayo nga baho nga mopilit sa sapot sa mga mobisita sa Taboan ug ubang merkado.

Nakahuna-huna ang mayor nga tingali magbutang sila og kwarto nga pahumotan pag-ayo og perfume aron mahanaw ang baho gikan sa merkado.

Sa Carbon Market, namatikdan nga ang nakapadugang sa kabaho mao ang mga bukog sa lainlaing karne nga dili dayon malabay sa mga tindera, samtang kadtong linabay na, dugay’ng makuha og anaa ra magtipun-og ug nanimaho na kilid sa merkado ug gilangaw.