Pulis, Tanod Paimbistigaran sa PCAC sa Reklamong Pagpangdagmal

Ang Police Coordinating Advisory Council (PCAC) sa dakbayan sa Sugbo mopaimbestigar sa giingong pagdagmal sa mga tanod ug kapolisan ngadto sa dinakpan nga suspetsado’ng snatcher.

Si Cebu City Vice Mayor Edgardo Labella mimando nga imbestigahon dayon ang maong nga reklamo ni Susana Ferrales, taga Barangay Tejero, dakbayan sa Sugbo.

Mireklamo si Ferrales kay matud niya ang iyang anak nga si Meylord Tan Ferrales alyas Bunso, 19, ulitawo, gikatahong gikulata ug gi-torture human madakpi kaniadtong Enero 28.

Ang batan-ong Ferrales gitudlo sa usa ka Mary Ann Jorqua, 45, taga dalan Palma, Barangay San Roque, nga maoy milabni sa iyang silver nga kwentas didto sa dalan Sergio Osmeña, Barangay San Roque samtang nagsakay siya’g PUJ.

Ang mga tanod nga misikop sa suspek mao sila si Emma Hernani, Elmer Samson, Florencio Odog Jr. ug Reynaldo Paca.

Matud sa inahan sa suspek nga ang iyang anak mitug-an nga gawas nga siya gikulata, gipakoryentehan usab kini sa kapolisan sa sulod sa prisohan ug gitanggong lapas sa gitagal sa balaud.

Dugang pamahayag sa inahan nga ang iyang anak gipasakaan og kaso sa kapolisan kaniadto lang Pebrero 4. Anaa na karon sa Cebu City Jail ang suspek.

Ang balaud naglatid nga kadto ra’ng mga suspek sa bug-at nga mga kaso nga mahimong tanggongong sulod sa 72 oras bisan wala pa’y kaso nga mapasaka.

Ang hepe sa Waterfront Police Station nga si Chief Inspector Wildemar Tiu nanghimakak sa mga pasangil nga ilang gikulata ang ilang dinakpan.

Matud ni Tiu nga ang dinakpan kanunay ra nga magbalik-balik sa pagkasikop, apan andam ang iyang mga sakop nga moatubang kon adunay reklamo nga isang-at batok kanila.