Mga Karaang Sakyanan sa City Hall, Ibaligya

Ang dakbayan sa Sugbo mobaligya na sa dul-an 200 ka karaang sakyanan sa City Hall nga napalit kapin sa pito ka tuig na ang milabay.

Matud ni Konsehal Roberto Cabarrubias nga gastoso na kaayo ang padayon nga pagtinil sa mga sakyanan nga napalit subra na pito ka tuig kay kanunay lang maguba.

Ang Cebu City Council miuyon nga ibaligya na kining mao nga mga sakyanan aron nga ang City Hall mopalit na usab og mga bag-o nga ipang-isyu sa iyang mga opisyal ug mga kawani.

Si Konsehal Cabarrubias miingon nga ang Bids and Awards Committee (BAC) giawhag nga mopahigayon og subasta sa maong mga sakyanan.

Kadaghanan sa 179 ka sakyanan gigamit pa hangtod karon, ang uban niini giisyu sa mga konsehal sa dakbayan.

Kadtong gusto nga mopalit og usa lang ka sakyanan dili katugotan kay ang pagbaligya niini himoon sa tiningob nga paagi.

Matud ni Cabarrubias nga kadtong gusto nga mopalit og usa lang ka sakyanan adto na sila mohangyo sa makadaug sa subasta.