Pagpadala’g OFW sa Thailand, Gidili

Mipagawas og ‘deployment ban’ ang Philippine Overseas Employment Administration(POEA) batok sa mga bag-ong na-hire nga Overseas Filipino Workers (OFWs) alang sa upat ka dapit sa nasud sa Thailand.

Si Elvira C. Bongosa sa Philippine Information Agency(PIA) nagkanayon nga gibutyag ni POEA Administrator Hans Leo Cacdac, ang mga dapit diin dili una padad-an og mga OFWs ang mao lugar nga Bangkok, Nonthaburi Province, Lad Lum Kaew District (Pathumthani Pro­vince), ug Bang Phli District (Samutprakan Province).

Midugang si Bongosa nga ang pagpatuman sa maong deployment ban nagsukad sa pagpasaka sa Department of Foreign Affairs (DFA) sa Crisis Alert Level 2 sa maong mga dapit human sa ideklarar sa kagamhanan sa Thailand ang 60 diyas nga ‘state of emergency’ tungod sa nagkadaku nga kagubot sibil sa nahisgotang nga lugar.

Gipasabot ni Bongosa nga ubos sa Crisis Alert Level 2, ang paghikay sa mga papeles alang sa papaulion lamang nga mga OFW nga adunay nagpabiling kontrata ang tugotan.

Samtang gisuspenso una ang paghikay sa mga bag-ong aplikante nga kwalipikado sa trabaho.

Miingon si Bongosa nga gitambagan ni Cacdac ang mga OFW sa Thailand nga magbinantayon ug likayan una ang paggawas sa balay kun walay importanteng mga lakaw.

Matud niya nga giingong angay usab nga magpabiling alerto ang mga OFW kun adunay kagubot sa ilang lugar.