BEO, Apil na sa Pagpanglimpyo

Walay pagsupak ang hepe sa Department of Public Services (DPS) sa dakbayan sa Sugbo sa sugyot nga usbon ang trabaho sa mga Barangay Environmental Officers (BEO) og paapilon na sila sa pagpanglimpyo.

Si Engr. Rolando Ardosa miingon nga nindot kaayo ang mao nga sugyot aron maepektibo ang kampanya sa dakbayan ug kabarangayan kabahin sa paglimpyo sa palibot.

Nabantayan nga dunay uban nga mga BEO nga igo lang magbarug-barog og tan-awon lang nila ang mga basura nga anaa gipanglabay sa daplin sa mga karsada.

Pagka karon ang mga BEO nga gidistino sa lainlaing mga barangay gitahasan lang pagpanakop sa mga tawo nga ilang masakpan nga magpataka’g panglabay og mga basura sa wala itugot nga dapit.

Matag barangay adunay labing minus ‘tag lima ka BEO mao nga dul-an sa 300 ka Barangay Environmental Officers ang nadistino sa 52 ka barangay nga ania mahimutang sa urban areas.

Ang ubang mga barangay kapitan, apil ni Kapitan George Rama sa Barangay Basak-San Nicolas, misugyot nga ang mga BEO angay’ng tahasan usab sa pagpanglimpyo sa mga basura.

Matud ni Ardosa nga tukma kaayo ang sugyot nga kon ang mga BEO makakita og mga tawo nga magpataka’g labay og mga sagbot ila kining dakpon apan manglimpyo usab sila sa kadalanan.