Pribadong Hospital Naningil Na

Lima ka pribadong ospital naningil na sa kagamhanan sa dakbayan sa Sugbo nga bayran ang P2.2 milyones nga obligasyon sa 38 ka pasyente sa Cebu City Medical Center (CCMC) nga gibalhin nila sa mao nga mga tambalanan.

Ang nahisgutang mga pasyente magpatambal unta sa CCMC apan naabtan kini sa pagtay-og sa linog kaniadtong Oktobre 15 nga nakapaguba sa ospital sa dakbayan.

Si Mayor Michael Rama mihatag og pagtugot nga ang mga pasyente nga magkinahanglan og dugang pag-atiman balhinon sa mga pribado nga ospital.

Wala dayon aprobahi sa Cebu City Council ang paggasto og P2.2 milyones alang sa bayranan sa 38 ka pasyente nga gusto ni Konsehal Dave Tumulak nga adto kuhaon sa Pagcor Funds.

Ang mga konsehal mihukom nga mangayo usa sila og opinyon sa City Hall Accounting Department kon tukma ba ang mao nga lakang.

Si Konsehal Margarita “Margot” Osmeña mipasabot nga ang Philippine Amusement and Gaming Corporation (Pagcor) adunay mga lagda kon unsaon paggasto ang ilang donasyon sa dakbayan sa Sugbo.

Matag buwan ang Pagcor mohatag og P3 milyones sa dakbayan sa Sugbo bugti sa pagtugot nga ang Pagcor gitugotan nga maka-operate og gambling casino dinhi sa siyudad.